ഓർമകളിലെ ഇന്നലെകൾ!

ഓർമകളിലെ ഇന്നലെകൾ! 

മൺവീടുകൾ, ഓലപ്പുരകൾ

🔳

ഓർമകൾക്ക് മുകളിൽ ഇന്റർനെറ്റ് കൊണ്ട് ഓല മെടയുന്ന പുതിയ കാലം.  മറവി കൊണ്ട് പോയ ചില ഇന്നലെകളെ കുറിച്ച് പുതിയ തലമുറകൾക്ക് കേട്ടുകേൾവി പോലുമുണ്ടാകില്ല. കാരണം പുതുകാല മുത്തശ്ശിമാർ കഥകൾ  പറയാറില്ല, അല്ലെങ്കിൽ  ഈ യുഗത്തിൽ മുത്തശ്ശിക്കഥകൾക്ക് പ്രസക്തി ഇല്ലാതായിക്കഴിഞ്ഞു എന്നും പറയാം. 

മണ്ണ് കൊണ്ട് പണിത ചെറിയ എടുപ്പുകൾക്ക്  മുകളിൽ ഓലയും ഒരു പ്രത്യേക തരം പുല്ലുകളും കൊണ്ട് മേഞ്ഞ മേൽക്കൂരയും ഉള്ള വീടുകൾ മാത്രം ഉണ്ടായിരുന്ന ഒരു കാലം. 

വർഷത്തിലൊരിക്കൽ പുര മേയുക എന്നത് ആഘോഷമാക്കിയിരുന്ന ഒരു തലമുറ, കരിപിടിച്ച പഴയ ഓലയും മുളിയും എടുത്തു മാറ്റി മേൽക്കൂര നവീകരിക്കുന്ന ദിനം, അയല്പക്കത്തുള്ളവരുടെ ഒത്തുചേരൽ, അവരുടെ ആത്മാർത്ഥ സഹകരണങ്ങൾ. മാസങ്ങൾക്കു മുമ്പ് തന്നെ മൂളിയും ഓലയുമൊക്കെ പലയിടങ്ങളിൽ നിന്നും കുറേശ്ശെയായി സംഘടിപ്പിച്ചു വെക്കും. പുതുക്കി പണിയാൻ ചില്ലറ മരത്തടികൾ വേണ്ടിവരും. അത് പല സ്ഥലങ്ങളിൽ നിന്നായി തെങ്ങിൻറെയും കവുങ്ങിൻറെയും മുളയുടെയും ഒക്കെ ചെറിയ തടികൾ തയ്യാറാക്കും. തെങ്ങിന്റെ തീയിൽ വാറ്റിയെടുത്ത പച്ചയോലകൾ വെച്ച് കെട്ടിയായിരുന്നു മെടഞ്ഞ ഉണക്ക ഓലകൾ അടുക്കി വെച്ച് പുര മേഞ്ഞിരുന്നത്. അന്ന്  ഞാനറിയുന്ന പുരമേയുന്ന ഒരേ ഒരാൾ ആദൻ ച്ചയായിരുന്നു. പേക്രോം തവളകളുടെ ശബ്ദം അനുകരിച്ചു അദ്ദേഹം ഞങ്ങളെ ഭയപ്പെടുത്തും.  ആദൻച്ച വരുന്നുണ്ട് പെട്ടെന്ന് അത് ചെയ്തോ ഇത് ചെയ്തോ എന്നൊക്കെ പറഞ്ഞായിരുന്നു ഉമ്മമാർ കുട്ടികളെ വിരട്ടിയിരുന്നത്.   

ഈ വര്ഷം എങ്ങിനെ പുരമേയുമെന്നും അതിനുള്ള കാശ് എങ്ങനെ കണ്ടെത്തും എന്നൊക്കെ ആലോചിച്ചു ബേജാറിലായിരുന്ന ഗൃഹനാഥന്മാരിൽ ആരും ഇന്ന് ജീവിച്ചിരിപ്പുണ്ടാവും എന്ന് തോന്നുന്നില്ല!

അതിന്നിടയിൽ എവിടെങ്കിലും അപൂർവമായി ഓട് പാകിയ ചില വീടുകൾ കാണാം.  അവരായിരുന്നു നാട്ടിലെ അത്യാവശ്യം സൗകര്യവും പാങ്ങും ഉള്ള ആളുകൾ.  പാങ്ങ് എന്ന് പറയുമ്പോൾ ഭക്ഷണത്തിന് വലിയ പഞ്ഞമില്ലാതിരുന്ന ആളുകൾ എന്ന അർത്ഥം.  അത്തരം ചില വീടുകളിൽ നിന്ന് പാവങ്ങൾക്ക് നേർച്ചക്കഞ്ഞി എന്ന പേരിൽ കഞ്ഞി നല്കാറുണ്ടായിരുന്നു.

  

ക്രമേണ പുല്ലുമേഞ്ഞ ഓലപ്പുരകൾ അപ്രത്യക്ഷമാകുകയും ഓട് പാകിയ സുന്ദര വീടുകൾ സാർവത്രികമാകുകയും ചെയ്തു.  

ഓടുമേഞ്ഞ പുരകൾക്ക് വഴിമാറിക്കൊടുത്തു കൊണ്ട് ഓലപ്പുരകൾ വിസ്‌മൃതികളിലാവുകയും ഓടിട്ട വീടുകളെ  പുതിയ കോൺഗ്രീറ്റ് വീടുകൾ കയ്യേറുകയും ചെയ്തു തുടങ്ങിയിട്ട് കാലങ്ങൾ കുറെയായി.

ഇത് കോൺഗ്രീറ്റ് വീടുകളുടെ ലാവണ്യ ശാസ്ത്രം തേടി പോകുന്ന പുതിയ കാലഘട്ടം. തൊണ്ണൂറുകളുടെയും രണ്ടായിരത്തിലെയും യൗവ്വനങ്ങൾക്ക് മൺ വീടുകളും ഓലപ്പുരകളും നെറ്റ് ബ്രൗസ് ചെയ്യുമ്പോൾ കാണുന്ന ചിത്രങ്ങൾ മാത്രം.  

രണ്ടു  മാറ്റങ്ങളെയും നേരിൽ കണ്ടവരാണ് വർത്തമാന കാലത്തെ അമ്പത് കഴിഞ്ഞവർ.

അങ്ങനെയുള്ള ഒരു  ഭൂതകാലാനുഭവത്തിലെ ഭൗതികസാഹചര്യങ്ങളും അതിലുൾപ്പെട്ട കുറെ മനുഷ്യരും മറവിയുടെ അകലങ്ങളിലേക്ക് പറന്നു പോയെങ്കിലും  രൂപമില്ലാത്ത ഒരു വികാരമായി അത് മനസ്സിൽ ഇന്നും തങ്ങി നിൽക്കുന്നു.  ഓർമ്മകൾ, ഓലക്കീറിലൂടെയും കിളിവാതിലിലൂടെയും  മെല്ലെ ഇരച്ചു വരുന്ന സൂര്യപ്രകാശം പോലെ ഇന്നലെകൾ കൂടെ വരികയാണ്.

എസ്-എ

30-06-2022

🔲

ഹാരിസ്...!!

🔲

ഹാരിസ്...!!

🔳

വാക്കുകൾ മരവിച്ചു പോകുന്ന സന്നിഗ്ദ്ധ ഘട്ടം, ഈ വിയോഗം താങ്ങാൻ കഴിയുന്നില്ല! പ്രിയപ്പെട്ട ഹാരിസ് നീയില്ലാത്ത ലോകം സങ്കൽപ്പിക്കാനേ ആവുന്നില്ല.  എത്ര വലിയ ഇരുട്ടാണ് നീ ഒഴിച്ചിട്ട ശൂന്യത എന്റെ അയല്പക്കത്തും നാട്ടിലും അവശേഷിപ്പിക്കുന്നത് എന്നത് നടുക്കുന്നതാണ്. 

നീ എന്തിനായിരുന്നു ജീവിതത്തെയും സ്വന്തം ആരോഗ്യത്തെയും ഇത്രമാത്രം നിസ്സാരമായി കണ്ടത്? ആ ശാന്ത പ്രകൃതത്തിൽ നീ സൂക്ഷിച്ചു വെച്ച ധൈര്യത്തിന് എന്ത് പേരിട്ടാണ്‌ വിളിക്കുക.  എന്തിനായിരുന്നു ഇത്രമാത്രം ധൈര്യവും ഇത്രമാത്രം ധൃതിയും!  

കാരുണ്യമായിരുന്നു നിന്റെ മുഖമുദ്ര.  നിന്റെ പക്വത, നിന്റെ നീതി ബോധം നിന്റെ സഹജീവി സ്നേഹം ഒക്കെയും കൊണ്ട് നീ ജീവിതം അടയാളപ്പെടുത്തി. ചോദിച്ചു വരുന്നവർക്കൊക്കെ നിന്റെ കഴിവിന്നപ്പുറം നൽകാൻ നീ ശ്രമിച്ചു.  വാക്കുകൾ കൊണ്ട് ഒരാളെയും നോവിക്കാതിരിക്കാൻ ശ്രദ്ധിച്ചു.  ചിട്ടയാർന്ന ജീവിതം കൊണ്ട് മാതൃക കാട്ടി.  വീടും പരിസരവും മാത്രമല്ല നിറമുള്ള ആ മനസ്സും എന്ത് മാത്രം വൃത്തിയോടെയാണ് നീ സൂക്ഷിച്ചത്!!

ഹാരിസ് നീ തിളങ്ങുന്ന നക്ഷത്രമായിരുന്നു. അതെന്നും അങ്ങനെ തന്നെ ആയിരിക്കുകയും ചെയ്യും.  ഉടപ്പിറപ്പുകൾ വിടപറയാറില്ല. നിന്റെ പതിഞ്ഞ ശബ്ദവും നിന്റെ സ്നേഹവും നിന്റെ സാന്നിധ്യവുമില്ലാത്ത  അയല്പക്കം എനിക്കോർക്കാനാവുന്നില്ല.  മറക്കാൻ ശ്രമിക്കുന്തോറും ആ മുഖം വീണ്ടും വീണ്ടും തെളിഞ്ഞു വരും.

പ്രിയപ്പെട്ട ഹാരിസ്, കണ്ണുനീരിൽ കുതിർന്ന പ്രാർത്ഥനകളല്ലാതെ വേറെന്തു നൽകും!! പടച്ചവന്റെ സന്നിധിയിൽ നിനക്ക് ഉന്നതമായ സ്ഥാനം ലഭിക്കട്ടെ. ഈ വേർപാട് താങ്ങാൻ പടച്ചവൻ കുടുംബത്തിന് കരുത്തു നൽകട്ടെ!

എസ്-എ

🔳

കുറുനരിക്കൂട്ടങ്ങൾ

കുറുനരിക്കൂട്ടങ്ങൾ

🔳

ചരിതമൊന്നുമേ വീര ചരിതമൊന്നുമേ 

കഥകളൊന്നുമേ ധീര കഥകളൊന്നുമേ 

മിഴികളിൽ എൻ്റെ സിരകളിൽ 

അരുത് നീയ്യിന്നു കരുതി വെക്കരുത്. 

അടിമ ഞാനിന്നു മുടിഞ്ഞ നാടാകെ  

കൊടിയ വിഷത്തിൻ കടലു തീർക്കുമ്പോൾ

മിഴികളിൽ ചത്ത വാക്കിൻെറ കണികയിൽ 

നിറമൗനമോതുന്ന നിർവികാരപ്പെരുവിരൽ 

കുടില് മാന്തുന്ന കുടൽ പിളർക്കുന്ന 

കരളു കത്തുന്ന കറുത്ത രാവിതിൽ 

കഴുക സംഘങ്ങൾക്ക് കാവലൊരുക്കുന്ന

കുറുനരിക്കൂട്ടങ്ങൾ  ഓലിയിട്ടു.

പക തീർത്തു പതിയെ മടങ്ങുന്ന നേരത്തു

പിറകിൽ നിന്നാരോ ഘോര ഘോരം മുഴക്കവെ 

മതി നിന്റെ വംശവെറിയുടെ ചൊറിയുമായ് 

ഇനി ഈ വഴികളിൽ നിന്നൂർന്നു കൊൾക!

എസ്-എ

22-04-2022

🔲

വാഴ!

വാഴ!

🔳

പഴയതു പോലെ ഇസ്ലാം മതത്തിലെ വിശ്വാസപരവും കർമ്മപരവുമായ കാര്യങ്ങളെ കുറിച്ച് ആർക്കും എന്തും പറഞ്ഞു പോകാൻ കഴിയില്ല.  അതിപ്പോൾ മത പണ്ഡിതന്മാർ എന്ന് പറയുന്നവരായാലും ശരി അതല്ലാത്ത സാധാരണക്കാരായാലും ശരി.  പ്രമാണബദ്ധമല്ലാത്ത കാര്യങ്ങൾ പറഞ്ഞാൽ ചോദ്യങ്ങൾ ഉയരും. ഇത് പഴയ കാലമല്ല.  എന്തും അണ്ണാക്ക് തൊടാതെ ചോദ്യങ്ങൾ ചോദിക്കാതെ അപ്പാടെ വിഴുങ്ങാൻ ആരും തയ്യാറാവില്ല.  

ഈ ക്ലിപ്പിന്റെ പൂർണമായ ഭാഗം കേട്ടിട്ടില്ല.  എങ്കിലും കേട്ടിടത്തോളം നമുക്ക് മനസ്സിലാകുന്ന ചിലതുണ്ട്.

ഇയാൾ  പറയുന്നത് വളരെ വിചിത്രമായ കാര്യങ്ങളാണ്.  വായിൽ തോന്നുന്നത് വിളിച്ചു പറയുക മാത്രമാണ് ചെയ്യുന്നത്.  പേരിനെങ്കിലും ഒരു പ്രമാണവും ഉദ്ധരിക്കുന്നില്ല. സ്വർഗ്ഗ നരകങ്ങളിൽ  ലഭിക്കാൻ പോകുന്ന രക്ഷാ ശിക്ഷകളെ കുറിച്ച് ഭൂമിയിലെ സൗകര്യങ്ങളെയും കഷ്ടപ്പാടുകളെയും വെച്ച് ഒരു താരതമ്യം ഒരിക്കലും സാധ്യമല്ല എന്നതാണ് വസ്തുത. അപ്പോൾ സ്വർഗത്തിൽ ലഭിക്കാൻ പോകുന്ന മദ്യപ്പുഴകളെ കുറിച്ചും ഹൂറികളെ  കുറിച്ചും മറ്റും പറയുന്നുണ്ടല്ലോ എന്ന് ചോദിക്കും.  

"മോഹിക്കുന്നതെന്തും ലഭിക്കുന്നു. ഒരു കണ്ണും ഒരു നാളും കണ്ടിട്ടില്ലാത്തത്, ഒരു കാതും ഒരു നാളും കേട്ടിട്ടില്ലാത്തത്, ഒരാളുടെയും ഭാവനയിൽ ഒരിക്കൽ പോലും വിരിഞ്ഞിട്ടില്ലാത്തത്" എന്നതാണ് ഇസ്ലാമിലെ സ്വർഗം. തീർത്തും നമ്മുടെ സങ്കല്പങ്ങൾക്കതീതമായ ഉത്കൃഷ്ടമായ ഒന്നാണത്.  എന്നാൽ, നമ്മുടെ പരിമിതികളെ അറിയാവുന്ന അല്ലാഹു  ലൗകിക പ്രപഞ്ചത്തിന്റെ ഭാഷയിലാണ് പാരത്രിക  ജീവിതത്തെ വർണിച്ചു തന്നത്. ഇത് കൃത്യമായി നാം മനസ്സിലാക്കിയിരിക്കണം. നരകത്തിൽ ശിക്ഷയല്ലാത്തതൊന്നുമില്ല. സ്വർഗത്തിലാവട്ടെ രക്ഷയും അനുഗ്രഹവും നൻമയുമല്ലാത്തതൊന്നുമില്ല. ആശിക്കുന്ന നൻമകളെല്ലാം കിട്ടുന്ന ഇടമാണ് സ്വർഗം.

ഈ ക്ലിപ്പ് ഒരു സുഹൃത്തുമായി പങ്കു വെച്ചപ്പോൾ അവൻ പറഞ്ഞത്, മുമ്പൊക്കെ ഞാൻ കോമഡി ക്ലിപ്പുകൾ കാണാറായിരുന്നു പതിവ്, ഇന്നതിനു  പകരം  ഇമ്മാതിരി പ്രസംഗങ്ങൾ കേൾക്കുന്നു. ഫലത്തിൽ രണ്ടും ഒന്നു തന്നെ എന്നാണ്!!

പക്ഷെ ഇത്തരം പ്രസംഗങ്ങൾ ഏൽപ്പിക്കുന്ന സാമൂഹ്യ ആഘാതം വളരെ വലുതാണ്.  മതത്തിനു ഏൽപ്പിക്കുന്ന പരിക്കും ചില്ലറയല്ല.  പലരും ഇസ്ലാമിനെയും മുസ്ലിമിനെയും അടിക്കാനുള്ള വടികൾ തയ്യാറാക്കി കാത്തിരിക്കുന്ന ഇക്കാലത്ത് പണ്ഡിതന്മാർ എന്ന് പറയുന്നവർ പ്രസംഗിക്കുന്ന  കാര്യങ്ങൾ നൂറു വട്ടം ആലോചനാ വിധേയമാക്കണം.  മുസ്ലിംകളിൽ പോലും സ്വർഗ്ഗ നരകങ്ങളെ കുറിച്ച് വികലമായ ധാരണകൾ വെച്ച് പുലർത്താൻ ഇത് പോലുള്ള പ്രസംഗങ്ങൾ കാരണമാകും. മൊത്തത്തിൽ പൊതു സമൂഹത്തിന് മുന്നിൽ ഇസ്ലാമും മുസ്ലിംകളും ഇത്തരം പ്രസംഗങ്ങൾ വഴി അവമതിക്കപ്പെടും എന്നതിൽ സംശയമില്ല.

🔲

പരിശുദ്ധമായ പശുവിൻ നെയ്യ്!

പരിശുദ്ധമായ പശുവിൻ നെയ്യ്! 

🔳

ആർ എസ് എസ് നെയും, എസ് ഡി പി ഐ യും സമീകരിക്കുവാൻ കഴിയില്ല എന്നത് ശരിയാണ്.  ആർ എസ് എസ് നെ ഐ എസ് മായും എസ് ഡി പി  ഐ യെ ക്രിമിനൽ ഗുണ്ടാ സംഘവുമായാണ് താരതമ്യം അർഹിക്കുന്നത്.   

എസ ഡി ഐ പി കാർ ഇടക്കിടെ ചോദിക്കുന്ന ഒരു എമണ്ടൻ ചോദ്യമുണ്ട് ഞങ്ങൾ നടത്തിയ ക്രിമിനൽ കുറ്റകൃത്യങ്ങൾ എന്തൊക്കെയാണ്  എന്നതാണത്.  കുറ്റകൃത്യങ്ങൾ ആര് നടത്തിയാലും പൊതുവെ സമ്മതിച്ചു തരാറില്ല.  ഞങ്ങൾ പത്തരമാറ്റ് പരിശുദ്ധമായ പശുവിൻ നെയ്യാണ് എന്നാണ് വാദിക്കുക.  തീവ്രവാദികൾ ചെയ്യുന്ന ചെയ്ത ജനദ്രോഹ പരിപാടികളുടെ കണക്കുകൾ അവർ തന്നെ സൂക്ഷിച്ചു വെക്കുന്നുണ്ടാകും. അതല്ലെങ്കിൽ പോലീസ് രേഖകൾ പരിശോദിച്ചാൽ കിട്ടും.  ഇനിയിപ്പോൾ പറയുക എങ്കിൽ നിങ്ങൾ അത് വാങ്ങിച്ചു തരിക എന്നായിരിക്കും!  

ഒന്നോർക്കുക നിങ്ങളുടെ നിലപാടുകൾ സമുദായത്തിന് നഷ്ടമല്ലാതെ ഒന്നും തിരിച്ചു തന്നിട്ടില്ല.  ഇനി താരനും പോകുന്നില്ല.  എല്ലാ വിധത്തിലുള്ള ആത്യന്തിക നിലപാടുകളും  ഇസ്ലാം വിരുദ്ധമാണ്. ഇന്ത്യയെ സംബന്ധിച്ചിടത്തോളം ഒരു ജനാധിപത്യ സംവിധാനത്തിൽ മുസ്ലിംകൾ സ്വീകരിക്കേണ്ട ഒരു മദ്ധ്യമ നിലപാടുണ്ട്. അതിനു മാത്രമാണ് പ്രവാചക അധ്യാപനങ്ങളുടെ പിന്ബലമുള്ളത്.  വാളെടുത്ത് നിരപരാധികളുടെ തല അറുത്താൽ സ്വർഗത്തിൽ പോകാനാവില്ല എന്തിനു "പെർള" വരെയെങ്കിലും നിങ്ങൾ എത്തില്ല എന്ന് മനസ്സിലാക്കാൻ പ്രായോഗിക ബുദ്ധി വേണം. 😂 വകതിരിവുണ്ടെകിൽ സംഘി ആവില്ല എന്നു പറയാറുള്ളത് പോലെ തന്നെയാണ്, സുഡാപ്പിയുമാകില്ല എന്ന് പറയുന്നത്.  

അപ്പോൾ ചോദിക്കും നിലവിലെ ഭരണകൂട ഫാസിസത്തിന് എന്ത് ബദലാണ് നിർദേശിക്കാൻ ഉള്ളത് എന്നും ന്യൂനപക്ഷങ്ങൾ അക്രമിക്കപ്പെടുന്നതിനും വേട്ടയാടപ്പെടുന്നതിനും എന്ത്  പ്രതിരോധമാണ്  തീർക്കുക എന്നും.  ഇന്ത്യ ഇന്ന് ഭരിക്കുന്നത് ബിജെപി ഒറ്റക്കല്ല  ബി ജെ പിയും കോർപ്പറേറ്റ് സംവിധാനങ്ങളും ചേർന്ന് കൊണ്ടുള്ള കുടില താല്പര്യങ്ങളാണ് എന്ന് എല്ലാവർക്കുമറിയാം.

സംഘ് പരിവാർ അപരജന വെറുപ്പിന്റെ പ്രത്യയശാസ്ത്രത്താൽ നയിക്കപ്പെടുന്ന രാഷ്ട്രീയ കൂട്ടായ്മയാണെങ്കിലും വിപണിയുടെ സമാധാന അന്തരീക്ഷണത്തിനു പോറലേൽപ്പിക്കുന്ന പ്രവർത്തനങ്ങൾക്ക്  കോർപ്പറേറ്റ്  ഭീമന്മാരുടെ പിന്തുണ ലഭിക്കില്ല.  അത് കൊണ്ട് തന്നെ ഈ നിമിഷം വരെ നമുക്ക് വിശ്വസിക്കാവുന്ന ഒരു ഭരണഘടനയും ജനാധിപത്യ സംവിധാനവും ഇവിടെ നിലവിലുണ്ട്.  അതിൽ തന്നെയാണ് വിശ്വാസമർപ്പിച്ചു മുന്നോട്ടു പോകേണ്ടത്.  ഫാസിസത്തിന് എന്നും ആവശ്യം വൈകാരികത കൊണ്ട് ഉറഞ്ഞു തുള്ളുന്ന ഒരു ശത്രുവിനെയാണ്.  വിവേകം നമ്മെ നയിക്കട്ടെ.  ഇപ്പോൾ ജനാധിപത്യത്തിലുള്ള വിശ്വാസം നിലനിർത്തി മുന്നോട്ട് പോകുകയാണ് വേണ്ടത്. ഭയപ്പെടേണ്ട ജാഗ്രത മതി.  

അത് കൊണ്ട് അവസാനമായി സൂചിപ്പിക്കാനുള്ളത്  "കേറി വാടാ മക്കളെ, ജനാധിപത്യ മതേതര കക്ഷികളായ  പാർട്ടികളിലേക്ക്!😂

എസ്.എ

19-04-2022

🔳

ഇബ്രാഹിം അങ്കോല

🔲

ഇബ്രാഹിം അങ്കോല

🔳

പരിചയപ്പെടുന്നത് ഒരു ഹെൽത് ക്ലബ്ബിൽ വെച്ച് ഏകദേശം ഒന്നര വർഷങ്ങൾക്ക് മുമ്പ്. കുറെ ആളുകൾക്കിടയിൽ വളരെ വാചാലമായി സംസാരിക്കുന്ന അദ്ദേഹത്തിൻ്റെ തൊട്ടടുത്താണ് എനിക്ക് ഇരിപ്പിടം കിട്ടിയത്. അവിചാരിതമായിരുന്നു ആ പരിചയപ്പെടൽ. സമകാലിക വിഷയങ്ങളിൽ നല്ല അവഗാഹമുള്ള അങ്കോല യുമായി ഒരു ഹൃദയ ബന്ധം സ്ഥാപിക്കാൻ തുടർച്ചയായ ഹെൽത് ക്ലബ്ബ് സന്ദർശനം ഇടയാക്കി. അങ്ങിനെ ഏകദേശം രണ്ടു മാസത്തോളം ഞങ്ങൾ ദിവസവും കാണുമായിരുന്നു.  പിന്നീട് ഞാൻ വിദേശത്തായപ്പോൾ സോഷ്യൽ മീഡിയ വഴി സുഹൃത് ബന്ധം തുടർന്നു കൊണ്ടിരിക്കുന്നു. തുടർച്ചയായി അദ്ദേഹത്തിൻ്റെ  മറുകുറിപ്പുകൾ വായിക്കുന്നു. 

മറുകുറിപ്പുകൾ സമകാലിക വിഷയങ്ങളിൽ പൊതിഞ്ഞ അനുഭവകുറിപ്പുകളാണ്.  ഏഴു പതിറ്റാണ്ടിൻെ ഓർമ്മകൾ ചാലിച്ച, വലിയ ഒച്ചയും ബഹളവുമില്ലാതെ, സൗമ്യമായി തഴുകി തലോടി വരുന്ന മന്ദമാരുതൻ പോലെ ആ എഴുത്തുകൾ  നമ്മെ തേടി വരുന്നു.  മറുകുറിപ്പുകളുടെ പ്രത്യേകത എന്തെങ്കിലും പുതുതായി പറയാനുണ്ടാകും എന്നതാണ്.  കാമ്പുള്ള കുറിപ്പുകൾ പലപ്പോഴും കുറിക്കു കൊള്ളുന്നവ കൂടിയാകുന്നു.

ചില നഗ്ന സത്യങ്ങൾ  വെട്ടിത്തുറന്നു പറയാൻ അദ്ദേത്തതിന് ഒന്നും തടസ്സമല്ല.  പറയുന്നത് സത്യമാണെന്ന പൂർണ്ണബോധ്യം അദ്ദേഹത്തിനുണ്ട്.  അത് കൊണ്ട് തന്നെ അവ നൽകുന്ന വായന സുഖം ഒന്ന് വേറെ തന്നെയാണ്. പരസ്പരം ചൊറിയുന്ന ഏർപ്പാട് ഏതു രംഗത്തും സർവ്വസാധാരണമാണല്ലോ  ആരെയും സുഖിപ്പിക്കാൻ വേണ്ടി അദ്ദേഹം എഴുതാറില്ല.  അനാവശ്യമായ വാഴ്ത്തു പാട്ടുകളും കാണില്ല.   

അങ്കോല  ഇബ്രാഹിമിൻെറ  സത്യസന്ധമായ എഴുത്തിൻെറ, ലളിത മലയാളത്തിൻെറ മാസ്മരികത ഒരനുഭവം തന്നെയാണ്. എഴുത്തിലും ജീവിതത്തിലും വസന്തം പൂത്തുല്ലസിക്കട്ടെ എന്നാശംസിക്കുന്നു.💕

എസ്.എ

17-O4-2022

🔳

വി.വി രമേശൻ; വികസന വിസ്മയം തീർത്ത വിപ്ലവവകാരി!

⭕

ചെറുപ്പകാല സൗഹൃദങ്ങളൊക്കെയും വ്യത്യസ്ത വഴികളിലൂടെ ജീവിതദൂരം താണ്ടിയപ്പോഴും എട്ടാം തരം മുതൽ നെഞ്ചോട് ചേർത്ത ഒരു നിലപാടിന് വേണ്ടി ജീവിക്കുക എന്നത് ഒരു നിയോഗമാണ്!  നഗരഭരണം അംഗീകാരത്തിന്റെയും ആദരവിന്റെയും ബാക്കിപത്രമായാണ് വന്നു ചേരുന്നത്. പാർട്ടി നേതൃത്വം നിർബന്ധിച്ചേൽപ്പിച്ച അധികാരം.  അധികാരത്തിന്റെ ഇടനാഴികകളിൽ തന്റെ ഊഴവും പ്രതീക്ഷിച്ച് കാത്തുനിൽക്കുന്നവരിൽ നിങ്ങൾക്കൊരിക്കലും ഇദ്ദേഹത്തെ കണ്ടിരിക്കില്ല! "സേവനക്കാരെല്ലാം ജീവനക്കാരായ നാളു തൊട്ടീനാട് നാശമായി" എന്ന് പറഞ്ഞത് കുഞ്ഞുണ്ണി മാഷായിരുന്നു.  ഇന്ന് നമുക്ക് എല്ലാ സേവനക്കാരും ജീവനക്കാരല്ല എന്ന് ഉറപ്പിച്ചു പറയാൻ കഴിയും.  നന്മയുടെ, കാരുണ്യത്തിന്റെ രാഷ്ട്രീയം എന്താണെന്ന് പഠിക്കാൻ, വികസനത്തിന്റെ രാഷ്ട്രീയമെന്തെന്ന് ബോധ്യപ്പെടാൻ നിങ്ങൾക്ക് മഹാകവി പി യുടെ നാട്ടിലേക്ക് തന്നെ വരേണ്ടി വരും.

നഗരഭരണത്തിന്റെ സിരാ കേന്ദ്രത്തിലേക്ക് രാവിലെ ഒമ്പതര മണിക്കാണ് ഞങ്ങളെത്തുന്നത്. ഞങ്ങൾ അഭിമുഖം ആവശ്യപ്പെട്ടിരുന്നത് പത്ത് മണിക്കും. ഒമ്പതരക്ക് തന്നെ ഫോണിൽ ബന്ധപ്പെട്ടു. കേവലം അഞ്ചു മിനിട്ട് കൊണ്ട് ഒരു ബേഗും തൂക്കി ആ മനുഷ്യൻ മുന്നിൽ നിൽക്കുന്നു. മിണ്ടുന്നതിന് മുമ്പേ ശബ്ദം നഷ്ടപ്പെട്ടു പോകുന്ന അവസ്ഥ. ചിരപരിചിത രാഷ്ട്രീയ ജീവിതങ്ങളുടെ വാർപ്പു മാതൃകകളുടെ കാറ്റൂരിക്കളയാൻ മാത്രം ശക്തമായ പുഞ്ചിരി!  ജീവനക്കാർ എത്തിത്തുടങ്ങുന്നതേയുള്ളൂ. അദ്ദേഹത്തിന്റെ ക്യാമ്പിൻ വൃത്തിയാക്കിക്കഴിഞ്ഞിട്ടില്ല.  വൃത്തിയാക്കിക്കഴിഞ്ഞ തൊട്ടടുത്ത മുറിയിൽ അഭിമുഖത്തിന് തയ്യാറായി അദ്ദേഹം ഇരിക്കുന്നു.

കുശലാന്വോഷണത്തിന് ശേഷം നേരെ അഭിമുഖമെന്ന ദീർഘ സംഭാഷണത്തിലേക്ക് ഒരു കുത്തൊഴുക്കായിരുന്നു.

2016ൽ കാഞ്ഞങ്ങാട് നഗരപിതാവായി ഭരണത്തിലേറിയ വി.വി രമേശൻ സംസാരിച്ചു തുടങ്ങുകയായിരുന്നു.

1972 ൽ ഒരിടത്തരം കുടുംബത്തിൽ ജനിച്ച  വി.വി രമേശൻ നിസ്വാർത്ഥ സേവനം വഴി പടിപടിയായി ഉയർന്നു വന്ന ജനനേതാവാണ്. 

എട്ടാം ക്ലാസ് മുതലാണ് എസ്. എഫ്. ഐ. യിൽ കൂടി വിദ്യാർഥി രാഷ്ട്രീയ പ്രവേശനം. തുടർന്ന്  ഡിവൈഎഫ് ഐ യിലെ ഏറ്റവും ചെറുപ്പമുള്ള പ്രവർത്തകൻ.  

നാല് വർഷത്തോളം സി. പി. എമ്മിൻ്റെ  ലോക്കൽ സെക്രട്ടറി സ്ഥാനം വഹിച്ച ഇദ്ദേഹം രണ്ടായിരത്തിൻ്റെ തുടക്കം മുതൽ യുവജനപ്രസ്ഥാനത്തിൻ്റെ നേതൃത്വത്തിലെത്തുകയും തുടർന്ന്

DYFI യുടെ സംസ്ഥാന ട്രഷറർ ആവുകയും ചെയ്തു. യഥാക്രമം  എസ്. എഫ്. ഐ - ഡി. വൈ. എഫ്. ഐ സംസ്ഥാന, ദേശീയ കമ്മിറ്റികളിൽ അംഗമായിട്ടുണ്ട്.    

മുപ്പത് വർഷത്തോളമായി സ്വന്തമായി ഖാദി ഭവൻ നടത്തുന്ന  വി.വി. രമേശൻ

പെയിൻ ആന്റ് പാലിയേറ്റീവ് രംഗത്തെ സജീവ സാനിധ്യമാണ്. 

പത്ത് വർഷത്തോളം പരിയാരം മെഡിക്കൽ കോളേജ് ഡയറക്ടറായിരുന്നു.  മുൻസിപ്പൽ ചെയർമാൻ എന്ന നിലയിൽ  ലഭിക്കുന്ന ശമ്പളവും അലവൻസും സ്വന്തമാവശ്യത്തിനെടുക്കാതെ ക്യാൻസർ രോഗികൾക്ക് വേണ്ടി മാത്രമായി ചെലവഴിച്ചു കൊണ്ടിരിക്കുന്നു.  അശരണരായ ആ മാറാരോഗികളുടെ സാന്ത്വനവും  അത്താണിയുമാണ് വി.വി. രമേശൻ. 

കാഞ്ഞങ്ങാട് നഗരത്തിന്റെ  മുഖച്ഛായ തന്നെ മാറ്റിയെടുത്ത  അദ്ദേഹത്തിന്റെ ഭരണ നേട്ടങ്ങൾ നിരവധിയാണ്.

ഭരണത്തിലേറിയ ഉടനെ ഏറ്റവും മുന്തിയ പരിഗണന നൽകിയത്  പ്രാഥമികാവശ്യ നിർവ്വഹണനത്തിന് സൗകര്യമില്ലാത്ത 273 വീടുകൾക്ക്  ശൗചാലയം നിർമ്മിച്ചു നൽകുക എന്നതിനായിരുന്നു. അത് വളരെ ഭംഗിയായി കാലവിളംബം കൂടാതെ അദ്ദേഹത്തിന് നടപ്പിലാക്കാനായി. വർഷങ്ങളായി  സാങ്കേതിക നൂലാമാലകളിൽ കെട്ടിപ്പിണഞ്ഞു കിടന്നിരുന്ന നഗരസഭാ ബസ്സ്റ്റാൻഡ് യുദ്ധകാലാടിസ്ഥാനത്തിൽ പണിപൂർത്തിയാക്കി ഒരാഴ്ച നീണ്ടു നിൽക്കുന്ന ജനകീയോത്സവത്തോടെയാണ് പൊതുജനങ്ങൾക്കായി ഇദ്ദേഹം തുറന്നുകൊടുത്തത്. കാഞ്ഞങ്ങാട് നഗരഹൃദയത്തിലെ അഞ്ച് കിലോമീറ്ററോളം റോഡ് നാല് വരിപ്പാതയാക്കി ഉയർത്തി. നഗരവികസനത്തിന്റെ ഭാഗമായി വെട്ടി മാറ്റേണ്ടി വന്ന തണൽ വൃക്ഷങ്ങൾക്ക് പകരം പുതിയവ റോഡിനിരുഭാഗങ്ങളിലായി  നട്ടു പിടിപ്പിച്ചു. നഗരസൗന്ദര്യവൽക്കരണം വളരെ ശാസ്ത്രീയമായി നടപ്പിലാക്കി.

നഗരത്തിലെ വിദ്യാലയങ്ങളുടെ അടിസ്ഥാന സൗകര്യങ്ങൾ വർദ്ധിപ്പിച്ചതോടൊപ്പം തന്നെ അവയെ ലോകോത്തര നിലവാരത്തിലേക്കുയർത്താനുള്ള പദ്ധതികളും ആവിഷ്കരിച്ചു.  

"ഒന്ന് ഒന്നാം തരം, മികവാർന്ന രണ്ടാം തരം, മികവേറും മൂന്നാം തരം" എന്ന ത്രൈവാർഷിക വിദ്യാഭ്യാസ വിപ്ലവകാമ്പയിൻ അതിൻ്റെ പൂർത്തീകരണം കൊണ്ട്  വൻവിജയമാക്കി.  സംസ്ഥാന സ്കൂൾ യുവജനോത്സവം ഇന്നേവരെ കേരളം പരിചയപ്പെടാത്ത ജനകീയ കലോത്സവത്തിലേക്ക് മാറ്റി എടുക്കുന്നതിൽ വി. വി. രമേശനും ചെറുതല്ലാത്ത പങ്കുണ്ട്.  കാഞ്ഞങ്ങാടിനെ വിദ്യാഭ്യാസ നഗരമാക്കി മാറ്റുക എന്നതാണ് ഇനിയുള്ള ലക്ഷ്യം. അതിൻ്റെ പ്രാഥമിക പ്രവർത്തനങ്ങൾ നടന്നു കഴിഞ്ഞു. 

അത് പോലെ കാർഷിക മേഖലയിലും പുതിയ പദ്ധതികൾ ആവിഷ്കരിച്ചു. നഗരത്തെ കാർഷിക രംഗത്ത് സ്വയംപര്യാപ്തമാക്കാൻ ഉതകുന്ന നഗരപ്രിയ പദ്ധതി ഭംഗിയായി നടപ്പിലാക്കാൻ കഴിഞ്ഞു.  ഹരിത കർമ്മ സേനയും പകുതി വഴിക്ക് നിന്നുപോയ പാടശേഖര കമ്മറ്റിയും സജീവമാക്കി.  അവരുടെ സഹകരണത്തോടെ കൃഷിഭവൻ്റെ നേതൃത്വത്തിൽ  തരിശായി കിടന്നിരുന്ന കൃഷിയിടങ്ങളെ കൃഷിയോഗ്യമാക്കിക്കൊണ്ടിരിക്കുകയാണിപ്പോൾ.  

100 മീറ്റർ പോലും  കോൺക്രീറ്റ് റോഡുകളില്ലാത്ത കാഞ്ഞങ്ങാട് മുൻസിപാലിറ്റിയിലെ മിക്ക റോഡുകളും കോൺക്രീറ്റ് ചെയ്തു. എല്ലാ പ്രധാന ജംഗ്ഷനുകളിലും ഹൈമാസ് വിളക്കുകൾ സ്ഥാപിച്ചു കൊണ്ട്  വെളിച്ച വിപ്ലവത്തിന് പുതിയ മാനം നൽകി.

ഹെഡ്കോയിൽ നിന്നും ഇരുപത് കോടി രൂപയുടെ വായ്പ സംഘടിപ്പിച്ചു 916 ഭവന രഹിത കുടുംബങ്ങൾക്ക് വീടുകൾ നിർമ്മിച്ചു നൽകി.  സർക്കാർ അനുവദിക്കുന്ന വികസന ഫണ്ടിനെ മാത്രം ആശ്രയിച്ചാൽ പല വിപ്ലവകരമായ പദ്ധതികളും നടപ്പിലാക്കാൻ കഴിയാതെ വരും എന്ന തിരിച്ചറിവിൽ നിന്നുമാണ് വായ്പ എടുക്കാനുള്ള തീരുമാനം ഉണ്ടാകുന്നത്.

കേരളത്തിലെ മിക്ക നഗരങ്ങളും അഭിമുഖീകരിക്കുന്ന വലിയ പ്രശ്നങ്ങളിൽ ഒന്നാണ് മാലിന്യ സംസ്കരണം.  കാഞ്ഞങ്ങാട് നഗരത്തെ മാലിന്യമുക്തമാക്കുക എന്ന ഉദ്യേശത്തോട് കൂടി നടപ്പിലാക്കുന്ന സംസ്കരണ പ്ലാന്റുകൾ പൂർത്തിയായിക്കൊണ്ടിരിക്കുന്നു.  

കേരളത്തിൽ ആദ്യമായി

തെരുവോര കച്ചവടക്കാർക്ക് തിരിച്ചറിയൽ രേഖയും അംഗീകാരവും  നൽകിയ നഗരസഭ എന്ന ബഹുമതി കാഞ്ഞങ്ങാട് നഗരസഭയ്ക്കുള്ളതാണ്. ഭരണത്തിലേറുന്നതിന് വർഷങ്ങൾക്ക് മുമ്പ് തന്നെ വി.വി. രമേശൻ തെരുവോരക്കച്ചടക്കാരുടെ കണ്ണിലെ കൃഷ്ണമണിയായിരുന്നു. അവരുടെ പ്രശ്നങ്ങൾ കണ്ടറിഞ്ഞ് അധികാരികളുടെ മുന്നിലെത്തിക്കാൻ  പ്രക്ഷോഭരംഗത്തിറങ്ങിയ ചുരുക്കം രാഷ്ട്രീയ നേതാക്കളിലൊരാളാണ് വി. വി. രമേശൻ. 2016ലെ  മുൻസിപ്പൽ തെരഞ്ഞെടുപ്പിൽ മത്സരിക്കുന്നതിന്  അദ്ദേഹത്തിന് കെട്ടിവെക്കാനുള്ള സംഖ്യ നൽകിയതും കാഞ്ഞങ്ങാട്ടെ തെരുവോരക്കച്ചവടക്കാർ തന്നെയായിരുന്നു.    

കായിക രംഗത്ത് കാസർകോട് ജില്ല വളരെ പിന്നാക്കമാണ്. അതിനൊരു മാറ്റം അനിവാര്യമാണ്. ഈയ്യിടെ സംസ്ഥാന സ്പോർട്സ് കൗൺസിൽ അംഗമായി നിയമിതനായ അദ്ദേഹത്തിൻ്റെ മനസ്സിൽ കായികരംഗം സമ്പുഷ്ടമാക്കാൻ  ഒരുപാട് പദ്ധതികളും നിർദ്ദേശങ്ങളുമുണ്ട്. 

ലോക്ഡൗൺ കൊണ്ട് ജനജീവിതം തന്നെ പ്രതിസന്ധിയിലായ കോവിഡ് കാലത്ത്  അമ്പത്തയ്യായിരം അതിഥി തൊഴിലാളികൾക്ക് തുടർച്ചയായി 45 ദിവസം സൗജന്യ ഭക്ഷണം നൽകി. ഇന്നും സമൂഹ അടുക്കളകൾ അങ്ങിങ്ങായുണ്ട്.  കേന്ദ്ര സർക്കാർ ലോക്സൗൺ പ്രഖ്യാപിക്കുന്നതിന് വളരെ മുമ്പ് തന്നെ കാഞ്ഞങ്ങാട് നഗരസഭ ലോക്ഡൗൺ മുൻകരുതലുകൾ എടുത്തിരുന്നുവെന്നതും പ്രത്യേകം പ്രസ്താവ്യമാണ്. .  

വിനോദ സഞ്ചാര മേഖലകളിൽ ഒരുപാട് സാധ്യതകൾ ഉള്ള ജില്ലയാണ് കാസർകോട്. തിരുവനന്തപുരം മുതൽ ബേക്കൽ വരെയുള്ള നിർദ്ധിഷ്ട ദേശീയ ജലപാതാ പദ്ധതി നേരത്തെ കോട്ടപ്പുറം വരെ മാത്രമാണ് ഉണ്ടായിരുന്നത്.  അത് ബേക്കൽ വരെ നീട്ടാൻ  നഗരസഭാ ചെയർമാൻ എന്ന നിലയിൽ ശക്തമായ ഇടപെടലുകൾ അദ്ദേഹം നടത്തി.  അത് പോലെ കാഞ്ഞങ്ങാട് റെയിൽവെ മേൽപ്പാലത്തിന് വേണ്ടിയും ശക്തമായ നീക്കങ്ങൾ നടത്തുകയും വിജയിക്കുകയും ചെയ്തു.

സംഘാടന മികവ്. ഇച്ഛാശക്തി. താഴെക്കിടയിൽ നിന്നു തുടങ്ങിയ പ്രവർത്തന പാരമ്പര്യം. തീരുമാനങ്ങളെടുക്കുന്നതിലെ മുൻഗണനാക്രമം - വി.വി.രമേശൻ  വ്യത്യസ്തനാകുന്നത് അങ്ങിനെയാണ്.

എം.വി. ഗോവിന്ദൻ മാഷും സി.കെ. പത്മനാഭനുമാണ് രാഷ്ട്രീയ ഗുരുക്കൾ. സംഘാടനവും രാഷ്ട്രീയ തന്ത്രങ്ങളും അവരിൽ നിന്നാണ് സ്വായത്തമാക്കിയത്. പിണറായി വിജയൻ, ഇ പി ജയരാജൻ തുടങ്ങിയവരാണ് വി.വി. രമേശന് മാതൃകാ വ്യക്തിത്വങ്ങളും ആത്മസൗഹൃദങ്ങളും. 

വളരെ താഴെക്കിടയിൽ നിന്നും സ്വപ്രയത്നം കൊണ്ട്  ജനകീയ നഗരപിതാവിലേക്കെത്തിയ ചരിത്രമാണ് വി.വി രമേശന് പറയാനുള്ളത്.  കാലത്തിൻ്റെ ആവശ്യമറിഞ്ഞ് പ്രവർത്തിക്കുന്ന വിവി രമേശിന് കാഞ്ഞങ്ങാടിന്റെ വികസന പ്രവർത്തനങ്ങളെക്കുറിച്ച് പറയുമ്പോൾ നൂറ് നാക്കാണ്.

നഗര വികസനത്തിന്റെ പുതിയ രാജപാതകൾ  തീർക്കുന്ന തിരക്കിലാണ് കാഞ്ഞങ്ങാട്ടുകാരുടെ സ്വന്തം വി.വി.ആർ!

⭕

എസ്.എ.പട്ല

🔲